هذا تعريف المحال ...{

جاني واحد و قال : بسأل ڪم سؤال,,

وقبل يسأل قلت : أنا ماني خبير !

قال: جاوب بس , يا ولد الحلال

وڪل ڪلمه حطّها .. فبيت صغير



قال نبدي : شنهو تعريف المحال .. ؟

قلت :



خل هالڪلمه

ف البيت الأخير .. !


آلقهر : إن شفت دمعات الرجال ..

والوطن : [ إنسان ] .. متغيّر ڪثير ,,



والطفل : لعبه على شاطي الرمال ..

والأمل : إحساس في عين الضرير ,,



الوفا : [ قلبين ] .. يجمعهم حلال ..

والرجل : اللي على أهلہ يغير ,,



والرجا : لا قلت : للواطي تعال ..

والفشل : مدري .. ولڪنہ مرير ,,



والشعر : في وقتنا .. بدر وطلال ..

زين وأوّل : حيل يعجبني جرير .. !



والغلا : إحساس إلى حد الخيال ,,

والعشق : لا شفت معشوقڪ تطير ..



والجفا : إعڪس مفاهيم / الوصال ,,

والوصل : يعني تأڪّد فيڪ خير ..



والعقل : تسفہ أقاويل الجهال ,,

والجهل : إن قلت عن نفسڪ ڪبير ..



والخطر : لا صار ما عندڪ مجال ,,

والبلا : إن صرت معدوم الضمير ..



والعجب : لا صرت تسأل منهو قال ,,

والتعب : إن ڪنت تبحث عن مصير ..



الغنى : بالنفس ما هو راس مال ,,

والفقر : من ڪان .. بأعماله فقير ..




يڪفي يڪفي .. أسئله إنهي الجدال ,,

ويالله علمني عن .. السّر الخطير ..



ما أبي تضرب لي في غيرڪ مثال ,,

قول : عنّڪ وإعتبر سرّڪ في بير ..



جات طعنہ من جنوبڪ والشمال ,,

يعني وضعڪ بين من حولڪ خطير ..



صاحبي وإن ضاقت بعينڪ ليال ,,

لڪ فرشت القلب مفروش الحرير ..



في [ بلاد الحلم ].. ممنوع العقال ,,

والمصيبه الشعب ما أختار الأمير ..



وما ألومڪ .. ڪان شدّيت الرحال ..

دام بيتڪ جرح / وفراشڪ حصير ,,



و هذا تعريفي إلى ڪلمة : محال ..

شي ودّڪ فيه ولا يمڪن يصير ..