من أسماء الله هو المطلب سبحانو و يحب العبد ايلا طلبو
العبد ايلا دعاه بلا شك يجاوب و الداعي يلقاه دايما بقربو
قدما تدعيه قدما هو يحب و يفرح لما تدقدق في بابو
هو ما يتعبش حتى أنت تتعب و لما تولي ليه تعاود تصيبو
عندو لكنوز و الفضة و الذهب و عندو للناس كل ما يطلبو
ويدان وبحور و الناس كي تطلب كأنهم طيور منو ينقبو
الإنسان برك لو كان جا يحسب شحال من أرزاق دخلت في جيبو
شحال لبس و لا كلا و شرب ما يقدرش يحصيه لو كان يحسبو
أتفكر كي كنت سهران تتقلب و تفكر فالرزق منين اتحيبو
لمن راح تروح شكون إلي تطلب شكون فوقت الضيق رايح تصيبو
رحت الأهل و زدت الأقارب صاحبك وخوك ألي من صلبو
ألي توصل ليه منك يتهرب و يقولك ما كاشو من وراء بابو
يا سبحان الله و تبقى مستغرب غير لبارح كان يخبط في جيبو
و يقول اتهنى ايلا ربي كتّب نعاونك بالشي ألي تطلبو
كان يوعد فيك أو وعدو كاذب كيما كثير من الناس يحبوا يكذبو
و كي يلحق الصّح يقولو الله غالب وّلا كي يشوفوك يّولو يهربو
و انت تلقى روحك وحدك تتعذب و هوما لاتيين يلايموا و يخبو
يا ويح ألي يكنز الفضة والذهب يسخنو و يتنكوا بيهم في جنبو
و كاين منهم الي يمدلك كي تطلب بصح على سّبة و ماشي من قلبو
و يبقى يفّّكر فيك و يّّّّمن او يحسب و تندم على نهار ألي رحت تطلبو
و لتما تتفكر بلي عندك رب تدعيه سبحانو و يفتحلك بابو
قد ما تقرب ليه تلقاه الاقرب و ما يحبش يشوف عيبادوا يتعذبو
بعثك للناس غير باش أتجرب و تتعلم الزمان و تقرالو حسابو
و تتعلم ثانيت كيفاش تسبب و كل واحد يعلم عديانو من صحابو
و كي يلحق الوقت يفرج الكرب و الخير ما تعرف منين تجيبو
بلاك مالشرق او بلاك مالغرب و لا بلاك تنوض قدامك تصيبو
او لوكان عطاك هذاك الصاحب ما كان راح ينقص والو من جيبو
او مدام كذب ايلا ربي كتب يروح برجليه يمدهم لطبيبو
و هذاك ألي ًمّن او باقي يحسب و حاسب الرزق يجي من جيبو
يجي نهار يطيح و يّّّّولي يطلب ياك حتى لجبال يطيحو و يريبو
ولي طلب الناس و قال الله غالب من ضعف اليقين و الإيمان في قلبو
يسأل البقرة ألي منها يحلب شكون الفلاح ألي تاكل من عشبو
و يسأل الفلاح على هاذ العشب شكون ألي عطاه و سقالو ترابو
يقولك الرب الله المطلب سبحانو و يحب العبد ايلا طلبو
العبد ايلا دعاه بلا شك يجاوب و الداعي يلقاه دايما في قربو
يبالله علاش تروح للناس بالمقاصد ولي تقصدو بالله واش عندو
لبنادم ولو عندو خير زايد تروح تلقاه حتى هو ماد يدو
رد بالك لا يصرالك كي الواحد ألي راح يطلب الرزق عند سيدو
دخل عليه في قصرو لقاه ساجد متهجد يطلب الله في سجودو
