ساكن في صحرة بين جبل وجبل جمل ورمل ونخل ياخي دشرة
لا فهامة لا علم والبنادم جهل حتى لمرى الحرة تتباع او تتشرى
يا حصرا شحال من دين ودين نزل كل واحد واش يعبد ولديان يا حصرا
يعبدوا لجبل يعبدوا لجمل يعبدوا البقرة والشجرة والحجرة
مانقدرش نحمل خير لوكان نهمل ولا نعيش مع ناس تعبد القمرة
وين جات نروح ، المهم نرحل نعيش فالصحرا وحدي على برّى
سمحت في مال سمحت فقشّي كامل خرجت وما سمعوا مني حتى هدرة
ماشي وحدي بين كثبان الرمل مستحيل نوّلي ليهم مهما يصرا
فات عليا يوم ليل وثاني كمّل ثالث ورابع وانا وسط الصحرا
ما بقالي الماء ما بقالي ما ناكل ما بقالي حول لا قوة لا قدرة
من كثرة التعب وليت نخايل ما عرفتش اذا سراب ولا بشرى
شفت كلّي فارس ملبعيد كحل ولما وصل لعندي شاف فيا بنظرة
كي شافني طايح من لحصان نزل جبد الما وبدى يشربلي بالقطرة
سالني وقالي لوين هكذا هامل باين عليك راك عايش اسوء فترة
سمعت الصوت عرفت ماشي راجل ومحنانة اليدين عرفت كانت مرى
وكي نحات اللثام ياناس لقيتها اجمل مما كنت نتصور واجمل مالقمرة
علاش الناس تعبد هاذ الحاجات كامل ونسات او خلاّت اجمل اية مصورة
لمرى الي ترفدك وتحطك طفل والي معاك تعيش ومعاك تكوّن اسرة
غست او رحت بعيد اداتلي لعقل بربرتني ورقدتني بحنانة ديك الهدرة
نساتني لعطش وقساوة الرمل لازم هاذ البشرى تسمعها كل الدشرة
لتم فطنت ولقيتها حطتني فالظل داواتني وخلاتني متوسد واحد الحجرة
وين رايح نلقى ذاك الزين الكامل لو ما كانت هي لا كنت في مقبرة
والقمرة ديالهم ما حبّتش حتى اتطل نكفر بالقمرة والي يصرى يصرى
ولازم نلقى لمرى ولازم اهلي كامل باش يعبدوا قمرة خير يعبدوا لمرى
كيفاش انفهّمهم ؟ لازم نلقى حل قلتلهم اليوم فالنهار شفت القمرة
لتم جتمعوا كامل ، الراجل هبل شافها فالنهار ادعولوا نشالله يبرى
قالولي القمرة فالنهار عمرها تطل وانا شفتها بعيني ماشية فالصحرة
فكروا غير شوّيا او ديروا لعقل ايلا ماشي هي ماكاش قمرة اخرى
القمرة تاع اليوم توقف مع الراجل سلكّتني مالموت ياناس عندها قدرة
تكلمت حتى معايا وقالتلي يا فيصل انا نبان فالنهار ماشي غير فالسهرة
قمرة تاع الصح عمرها ما تتبدل فالليل او فالنهار تبقى ديما منورة
و قمرتكم فالنهار لوين راي تهمل ؟ جيبولي برهانكم اذا عندكم قدرة
القمرة تاع اليوم تحّس بيها لداخل ما تعوضها شمعة قنديل ولا جمرة
مرى شابة ديما منورة تشعل فالليل او فالنهار ديما تالقاها حاضرة
لمرى ماشي دين افهمني ياعاقل لكن المفتاح تاع الجنة الخضرا
هي يماك وهي الشريك الاول وهي نصف الدين لا كنت فدينك تقرى
لمرى والراجل كل واحد يكمل الثاني وتربط بيناتهم العشرة
ويجيبوا ذرية والدنيا تتواصل باش يعبدوا ربي واحد وماشي عشرة
لتمّ تفاهموا وجتمعوا اهلي كامل وتناقشوا على الشي الّي راهو يصرى
وقالوا الطفل... كبر او ولاّ راجل لازم نزوجوه و نشوفولو كاش مرى
