بسم الله عالــــــم الشهـــــادة سبحــــانو عــــالم الغيبي
والصلاة والسلام على المقتدى محمــــد النبــــي العـربي ً
لمّا انا حسّيـــــت بــــالوحــــدة ولما بغيـــت نشكي عذابي
مــا قصدت هـــذا ولا هـــذا قصدتك غيـــر انت يا ربي
راني حــــــاير منيــــــن نبــدى وانت العــالم ما في قلبي
سبحانك انـــت علــــمك عدّى الشي الي راه فقلبي مخبّي
رانـي جــــايك وحـــدة وحــــدة ما نروح شرقي ولا غربي
نـــروح للقبـــلة نسجــد سجـدة لتمّا الي نبكي ونفـرّغ قلبي
خايــــــف بـــرك ايــــلا نتمادى وانا نشكيــــلك عــــذابي
عسى نقـــــول كــــلمة زيـــادة ما تليقش بمقامك يـا ربي
عارف قلبــــي ليــــــك نـــادى غير لمّـا تغلقوا بــــوابي
قصدتك غير في وقت الشـــــدة لمّا الضّـــر لحق لجنابي
وغيــــر تفــــــرّج علّيا مبـــعدا غير لمّا نــــــدّي جوابي
نعــــاود نــــوّلي كيـــــما العادة عاصي نلايم غير فذنوبي
ربي رانــــــي حــــــاب نتنهدى اهديـــني واستـر عيبي
والدعـــــــاء يــــــاك عبــــادة سلّكت بيها شحال من نبي
براهيم عليه السلام نــــــادى لمّا قالوا للنــــار الهبي
انت قلتلـــــها كــــوني بــــردا وسلاما سبحـــانك ربي
ويوسف الي فالحبس عـــــدّى سنين وسنين وهو مخبّي
ولما دعاك دعـــــوة وحــــــدة ردّيتو حاكم لخزاين ونبي
وزكريا تنحــــرم مـــالولادة دعاك ربي بعد الـــشيـبي
قـــــالك لا تــــدرني فـــــــردا بشرتو بيحيى حكيم و صبي
والحوتة الي كــــــــانت رافدة يونس في كرشها مخبّي
وسط البحـــر وطـــــالت المدة وخرج سالم كي دعاك ربي
وايوب صبر شحــــــال وتحدى وشاف زوجتو شعرها مخبي
عرف بلّـــي باعتـــو ولتم بدى يقولك مسني الضر يا ربي
ولالة مريــــم نعــــــــم الوالدة وسط الصحرة دعاتك ربي
فرجت عليــــها وهــــي قاعدة وقلتلها كـــــولي واشربي
ولما دخلت لأهلـــــها رافــــدة عيسى وهو رضيع وصبي
تهموها فولدها ولتــــــــم بدى يتكلم معاهم بقـــــدرة ربي
والصلاة والسلام على المقتدى سيدنا محمد النبي العربي
دعوتو خــــــلاّها اومبـــــــعدا شفـاعة لينا عندك يا ربي
ربي عنــــدي دعــــوة وحــــدة الاهي لا تخيّــــــب طلبي
هذا شحـــــال وهـــــــاذي مدة وانا نحبـــها وكـاتم حبي
هي لعمــــر وهـــــي الكبــــــدة وهي الســــر الي مخبي
ماهي سمرا مـــاهي بيضـــــا بين الأمازيغي والعـربي
ونهار الي تكون معـــــــروضة للعراس الدعوة تلــــــبّي
تشوف لبنات بـــــــآخر موضة بالحطات ولباسهم غربي
ونتاجـــــاتها يدّلكــــــوا الجلدة زادوا صبغو شعرهم ذهبي
او يتسائلوا شكـــــون دالوحدة الي دخلت بلباسها الشعبي
دايرا حايك وعجار بيــــــــوضا ولاّ حجاب تحتــوا مخبي
وش من ذهـــب وش من فضة سبحانك ما صورت يا ربي
مستورة وسنــــانها بيــــــوضا ديما تضحك وحامدة ربي
وياك خطبتها شخال من وحدة لولدها الشرقي ولا الغربي
ولو كمــــلّت هـــــي العــــــــدّة تاع زوجها يرحمــــو ربي
حبّت تقعــــــد دايـــــما هكـــــذا وما تتزوجش بــــالاجنبي
فالشهيـــــــد قعــــــــدت شايدة ما دامو حي فرحمت ربي
عرفتوا درك شكون ذالــــوحدة شكون هي حبيــــبت قلبي
هي لعمــــــر وهـــــــــي الكبدة هي عشــــقي وهي حبي
هي السمـــــرة وهـــــي البيضا ارض الامازيغي والعربي
ارض الوئـــــــام ارض الفــــدا ارض الجهاد شعبها حربي
مليون او نص مليون شهــــادا سي لحواس والسي لعربي
ديدوش مراد ولالــــــــة وريدة وحسيبة وبن صافي الصبي
وعميــــــروش أيــــــت حمودة وعلي لا بوانت يرحمو ربي
طالب او عبّان ولوكــــان نبدى نموت او ما نكملش حسابي
سبع سنين كـــــانت مــــــــــدة وستقليـــــنا كي بــغى ربي
خرجت فرانسا وهـــــــي رافدة يدها فوق راسها كيف الغبي
وليـــــنا احـــــرار او مــن بعدا دخل ريح شــــرقي وغربي
هذا خطـــــف وهـــــــــــذا ادى هاذوك حســـــابهم مع ربي
وزاد لحــــق وقــــــــــت الشدة انت قبايلي وانت عربي
انت مسلــــــم وانــــــــــــت كذا و لوخر مجرم او ارهابي
نشفى عليهم وحــــدة وحـــــدة ناس القصبة او صالومبي
بن طلحة وساحـــــة الشهــــادا سماعيل يفصح او مجوبي
عبد الحـــــق بــــــن حمــــودة او بوضياف يرحمو ربي
جاوود ومصــطـــــفى عبــــادة وكلّة وبختة وشيخ وصبي
وبــــاب الــــوادى الشـــهـــادا كامل كامل ارحمهم يا ربي
الفضــــة دايــــــما تبــقى فضة والّي ذهبــــي يبقــى ذهبي
ومهما يزيدوا يعفســوا الوردة تزيد ريحتـــها بقدرة ربي
عشر سنيـن راحـــت ســــــودا ولمّا حــــب وقــــــدّر ربي
عبد العـــــزيز في وقت الشدة لقيتو راجل واقف جنبي
جاب السمـــــاح وبيـــــــه بدى والسماح ياك يحبو ربي
عـــــاودنا وليـــــــنا امة وحدة وتصالح شعبي مع شعبي
ربي عنـــــدي دعــــــوة وحدة الاهي لا تخيّــــــب طلبي
حب الاوطـــــان يـــــــاك عبادة من الايمان عليــــها ربي
رانــــي حـــــاب منّــــا وهكــذا الشي الي راهو لينا مخبي
نشاء الله يكون خير ملّي مضى وتحيا بلادي ويحيا شعبي
