يالي سالتنى عالحجاب وقلتلي وعلاش ماتكتبش عليه
نقولك بنت الناس غلطتى فالباب انا مانى عالم ومانى فقيه
نقولك برك الحق باه مانكونش كداب ولا شيطان اخرس ونسكت عليه
نشدك من قلبك ونوصلك للباب والباقي عليك انتيا لي تكمليه
اتوجهى لله وافتحى لكتاب اقراي القران وحاولي تفهميه
ورايي انا ماتديروش حساب وحتى راي الناس ماتحوسيش عليه
مادام نزل الحكم الصواب وربي سبحانو تكلم عليه
في سورة النور وسورة الاحزاب ربي الخالق يامر في نبيه
يستر بناتو وزوجاتو بالحجاب ويستر المؤمنات صلى الله عليه
لبنادم كان حاب ولا ماشي حاب هنا الامر مهوش بيديك
الي قالها ربي نديرها بالترحاب ربي قالك ديريه يعنى ديريه
لانو هو الرحيم التواب والي يرحمو راه يتوب عليه
وذا تاب عليه يفتحلو البواب باش يربح هنا ويربح لهيه
ولوكان اتديريه ايمانا واحتساب وبنية صادقه وخالصه ليه
اتاكدي بلي رايح يجيك شباب ومكانش الوحدة الي ندمت عليه
صح فالاول راح عليك يصعاب يجي ليك ابليس يلعنو ويخزيه
يقولك مازالك في عز الشباب هدا الزين كامل رايحه تخبيه؟
الايمان فالقلب وانت راكى صواب روحي شوفي كيفاه راهم يمرمدو فيه
زعما من برى راهم ديرات حجاب والي مخبي غير ربي يعلم بيه
قوليلو ياابليس كلامك شباب مليح مليح الي يطيع ربي وما يعصيه
لكن البنادم خطاء تواب لما يعمل السوء ملازمش يجهر بيه
ولي يستر نفسو يعمل حساب لهداك النهار لما نروحو ليه
رب يسترو فيوم الحساب يحاسبو والناس كامل بعاد عليه
خير من يفضحو قدام الاحباب وخاوتو واصحابو واهلو وماليه
ويقراو كامل واش كاين فالكتاب الي ربي وحد هو العالم بيه
يالي سالتنى على الحجاب هدا هو الشيئ الي نقدر عليه
وادا حتى الهنا مالقيتيش جواب لجواب تلقايه.....نهار تدريه
شرح بعض الكلمات:
برك =بس-وعلاش=ليه = لماذا-انتيا=انتى-ماهوش=مش=ليس-تديريه=تعمليه-باش=لكي- مكانش=مفيش=ليس هناك-شباب=حلو=جميل-راهم=انهم-روحو=نفسو
